(( سرير ))

الهدف منها تشجيع الاطفال انهم يناموا في اوضتهم الخاصة بيهم .

حدوتة النهاردة ...( سرير سمير )

كتابة و تأليف : شيماء عبدالعال

كان ياما كان ....كان في زمان ....ولد جميل اسمه سمير ......كان سمير دايما بيخاف ينام في سريره لوحده .....😨😨و كان علي طول يطلب من مامته يا اما تنام جمبه في سريره ......يا اما يروح هو ينام جمبها في سريرها .....😔😔

مامته اتكلمت معاه كتير ان كدة غلط لانه دلوقتي بقي كبير  ....و قالتلوا بص يا سمير زمان انا كنت بنام جمبك لانك كنت بيبي .....👌👌 و كنت بتقلق كتير بليل علشان بتبقي جعان و عايز ترضع او عطشان او محتاج اغيرلك الحفاضة...

لكن دلوقتي انت كبرت و بقيت بتعتمد علي نفسك و لازم تنام في سريرك لوحدك....😏😏...كان سمير يفضل يعيط و يقولها :انا خايف يا ماما. مش هعرف انام لوحدي . و لو قعدت مامته جمبه علي سريره لحد ما سمير يروح في النوم و تيجي تقوم .....😱😱..يتخض سمير و يجري بسرعه علي اوضه مامته .

و في يوم من الايام جت جدته علشان تقعد عندهم كام يوم ......👵👵 فرح سمير جدا و قالها الحمد لله يا تيته ....حضرتك هتنامي جمبي في سريري أحسن انا بخاف انام لوحدي ......

استغربت جدته و سألته معقول يا سمير دانت يا حبيبي كبير ؟ بتخاف من ايه ؟ ...😒😒.رد سمير و قالها بخاف من الوحوش و بفضل احلم احلام وحشة اوي كل ما اغمض عينيا .....😞😞

سمعه باباه فرد و قاله : يا سمير يا حبيبي مفيش حاجه اسمها وحوش انا قولتلك كذا مرة .....😷😷 و بعدين مش انا قولتلك انك قبل ما تنام يا ريت تتوضي و تعمل خطوات الوضوء اللي الميس علمتهالكم في المدرسة .☺☺

بصيت له جدته و قالتله طيب ايه رايك يا سمير ......😃😃انا هقولك علي طريقة مش هتخليك تخاف من حاجه و لا تحلم بأي حاجه وحشة خالص ..

رد سمير بفرح و قالها بجد يا تيته قولي : قالتلوا اول حاجة مدام بتعرف تتوضي يبقي الاحسن تتوضي قبل ما تنام زي ما بابا قالك كدة .👆👆...
تاني حاجه بعد ماما ما تحكيلك الحدوتة تنام علي جمبك اليمين و لو مش عارف انهو جمبك اليمين ماما تقولك 👵👵.تعرف ان سيدنا محمد عليه أفضل الصلاة و السلام كان بيعمل كدة ؟

و في دعاء حلو اوي لازم تقوله قبل النوم ....بأسمك ربي وضعت جمبي و بك ارفعه ......ردد سمير ورا جدته .😌😌...بأسمك ربي وضعت جمبي و بك ارفعه ....الله دة سهل اوي يا تيته . ها و بعدين .

كملت جدته و قالتله : و بعدين بقي تقول في سرك اي سور قصيرة انت حافظها من القرآن ....😍😍😍 و بكدة ربنا هيحفظك و هتحس نفسك انك مطمن و مش خايف خالص .

و بعدين بقي تغمض عينيك و تتخيل أنك شايف نفسك موجود في احلي مكان انت بتحبه النادي مثلا او المدرسة مع اصحابك او حتي علي شاطئ البحر .....👌👌

و بتلعب مثلا مع اكتر ناس انت بتحبهم باباك و مامتك او اختك او اصحابك اللي بتحبهم   .

هتلاقي نفسك روحت في النوم و هتحلم كمان احلام جميلة اوي و هتصحي الصبح مبسوط جدا و نشيط .😌😌
ابتسم سمير و قالها الله يا تيته دي فكرة حلوة اوي .انا هجربها النهاردة ان شاء الله .

اتبسطت مامته و باباه اوي منه و قالولوا برافوا عليك يا سمير .....اخيرا هتنام لوحدك في السرير ....😀😀

ضحكت تيته و قالتلهم من النهاردة سمير هينام لوحده في السرير و انا كمان هنام في الاوضة التانية لوحدي . 😃😃

و توتة توتة خلصت الحدوتة
خلوا اولادكم يجاوبوا علي الاسئلة دي :
1-سمير كان بينام دايما لوحده في السرير ( ✔/❌ )
2-اول ما مامه سمير تقوم من جمبه بعد ما ينام كان بيتخض و بيخاف  ( ✔/❌)
3-في يوم من الايام جه جد سمير علشان يقعد عندهم كام يوم (✔/❌)
4-جدته قالتلوا ان لما يجي ينام علي جمبه الشمال ( ✔/❌)
5-سمير اتفق مع تيته انه هيجرب النهاردة ينام لوحده في السرير ( ✔/❌)