فاكرين قصة الوزة اللي بتبيض ذهب...قصة قديمة.
عايزة افكركم بيها .
فاكرين قصه الراجل اللي صحي الصبح لقى الوزة بتاعته باضت بيضة دهب و بقت كل يوم تبيض له بيضة دهب.
كان فرحان و مش مصدق نفسه و كل يوم كان يعتني بالوزة و اعتبرها الكنز بتاعه يصحى الصبح بحماس وياخد البيضه يبيعها و يستنى اليوم اللي بعده عشان ياخد البيضة الجديدة . قصه جميله قوي و خرافية جدا .
لكن الجزء الواقعي اللي فيها ظهر في اللحظة اللي الراجل قرر انه مش هيستنى .. و بدل ما يفضل يعتني بالوزة كل يوم و يتعب نفسه هو قرر انه يدبحها . ايوه ..هو فكر ان الدهب اكيد هي شايلاه في بطنها و انه ما يتعبش نفسه بعد كده بقى .. هو يدبحها عشان ياخد بقية الدهب اللي في بطنها مره واحده.
طماع قوي الراجل ده و الاشد و أخطر انه كمان جاهل قوي قوي .. والطمع و الجهل لما يتجمعوا على بعض لازم تحصل خسارة و لابد الخسارة تكون فادحه .
و ده اللي حصل في قصتنا . ان الرجل دبح الوزة و دبح معها حلمه في الثراء.
العلاقات عامله زي قصة الراجل ده .. و الوزة هي الزواج و الدهب هو الحب و الاهتمام اللي بتحصل عليه من شريك حياتك ..بتبدي العلاقة دايما بالبيضة الدهب و هي إقبال طرف على الآخر و منحه الحب بغزارة .. لو الطرف المستقبل للحب انبسط بالبيضة الدهب و هي إقبال المحبوب و فضل ياخد و ياخد و هو مش بيدي فهو في الحقيقة مش بيعتني بالوزه اللي بتبيض له دهب .
ايه صور عدم اهتمامه بالوزه ؟
- لما يطلب من المحب انه يسيب حياته كلها و يتفرغ له و يعتبر اهتمام الآخر باي شيء غيره اهانه له .
- و انه لو اتعصب يتنرفز عليه و المفروض يتحمل اهاناته المتكررة.
- و انه لو اهله غلطوا في حق شريك حياته ما يدافعش عنه بحجة بر الاهل .
- و انه يخونه بعلاقات جانبية و يرجع يعتذر و يطلب السماح و بداية جديدة كأنه ما عملش حاجه
- .. و انه و انه و انه .. حاجات كتير يهين بها العلاقه بكل طريقه ..و هو منتظر الوزه تفضل تبيض كل يوم بيضة دهب. لما الوزة تصحى في يوم و تقول انا تعبانه ..صاحب الوزه بيقول لها بلاش دلع ..بلاش كسل اديني البيضه بتاعتي .. ايه هتكون النتيجه ..طبعا الوزه هتدبل و هتموت في الآخر. يعني ايه ؟ يعني خلاص يموت الحب و تنهار العلاقة .
الدرس المستفاد ايه ؟
الجواز ( و العلاقات عموما ) وزه بتبيض بيضه دهب اللي هي الحب .. و اللي مش هيعتني بالوزه مش هيلاقي دهب..
انتوا أذكى من الراجل صاحب الوزه .. انتوا هتعرفوا تحافظوا على الكنز بتاعكم .
راعوا علاقتكم و احموها واشكروا بعض و استمتعوا بعطائكم كل يوم لبعض .
افتكروا دايما الوزة محتاجه وقت و جهد و رعاية و طبطبة و حب و هدية و كلمة حلوة و شكر و تقدير و إحساس بالثقة و الأمان .
ما تستخسروش في الوزة بتاعتكم عشان متخسروهاش.
يا رب نفهم بقى لاحسن أنا تعبت .
و المطلوب سهل و نتايجه مضمونه و الله .
حتى لو مبتعرفوش إتعلموا ...
دمتم متحابين 💞💞💞
Post a Comment