فصلت
( قصة واقعية)
خطبتي كانت تقليدية جداً…
حماتي اجت شافتني و عجبتا… جابت ابنا و عحبتو
صليت استخارة و انشرح صدري لمروان… و وافقت عالخطبة
مروان كان مهندس ميكانيك يشتغل بدبي….وضعو مرتاح كتير و مبين عليه شب مثقف وخلوق… وحيد على تلت بنات…
بلشت فترة تعارفنا بطريقة رائعه… مضينا شهر متل الحلم و فوراً اخدنا وش ع بعض و صرنا نحس انو نحنا مخلوقين لبعض…
بعد هالهشر صار لازم يرجع ع شغلو و اتفقو اهلنا سنه بيرجع لعندي منعمل العرس و بياخدني…
مع هيك ما بعدنا عن بعض بنووووب… كان يرجع من شغلو و يضل يحكيني عالنت لوش الصبح، تعرفنا ع بعض و فهمنا شخصيات بعض و اتفقنا ع حياتنا الجايه كيف رح تكون حتى اولادنا قررنا اساميهن… كنت اسعد انسانه بالدنيا…
كل ما يجي حدا من دبي مروان يبعتلي هدايا
شي عطر تقيل من ديور
شي مكياجات ماركات عالميه
و الدهب كمان كان يبعتلي منو كتير و حماتي حبابه و فرحانه بابنها ما كانت تزعل بالعكس…
اخر مرة قبل نزلتو بشهر كان جايه ابن عمو و قلي انو بدو يبعتلي معو قطعة دهب…
رهف: حبيبي ممكن هالمرة انا اطلب هديتي؟
مروان: اوووه اخيراً يئست منك قد ما قلتلك اطلبي… قليلي حبيبي شو عبالك؟
رهف: بدي سلسال و التعليقه الي فيه يكون محفور عليها آية من القرآن الكريم بتعنيلي كتير… بتقدر تعمل هيك شي؟
مروان: ايه طبعاً بخليهن يشتغلوها طلب خاص… بس طلبك غريب
شو هي الاية صار عندي فضول؟
رهف: ههههه رح اشرحلك… وقت كنا صغار جوز خالتي ابو حمزة عرفتو؟
مروان: ايه طبعاً و النعم منو… مو هاد الي قلتيلي بشتغل امام جامع؟
رهف: ايووووه هاد هو ياعمري…
مروان: تمام شو دخلو بالموضوع؟
رهف: جايتك بالحكي، وقت كنا صغارجوز خالتي جمعنا مره انا و اخواني و اولادو… و قلنا انو نحنا هلا كبار و هو بدو يهدينا هدية… كان كاتب آيات من القرآن الكريم ع كل ورقة معو و طاويها… و قلنا يلا اختارو…
انا اخترت ورقة و طلعتلي الاية الي بدي منك تحفرلي ياه عالتعليقة…
و وقتا ما بنسى كيف كنا قاعدين حواليه متل الصيصان و مهتمين كتير بحديثو لان كنا نحترمو و نحس بالامان معو…
حكالنا كل واحد منكن يحافظ على الآية الي اختارها لانو رح يجي يوم و يحتاجها… و هي رح تكون سبيلو للنجاة
و نحنا كنا اطفال… و عقل الطفل بعلق فيه الحديث
وقتا بتزكر كيف خبيت الورقة بايدي الصغيرة و ما خليت حدا يقرألي آيتي…. و حاولت هجيها لحالي… و كتير كتير بتعنيلي و بستبشر فيها خير
مروان: حلو… طيب ما قلتيلي شو كان نصيبك انتي؟
رهف: هي يا سيدي نصيبي كان من سورة فصلت الآية الكريمة 30 ل 32…. عمرك وقفت عندا و فكرت فيا؟
مروان: قلك شي بس لا تفهميني غلط… انا ما عرفتها
رهف: مو مشكلة… بقول رب العالمين بكتابو الحكيم
بسم الله الرحمن الرحيم: ﴿ إِنَّ الَّذِينَ قَالُوا رَبُّنَا اللَّهُ ثُمَّ اسْتَقَامُوا تَتَنَزَّلُ عَلَيْهِمُ الْمَلَائِكَةُ أَلَّا تَخَافُوا وَلَا تَحْزَنُوا وَأَبْشِرُوا بِالْجَنَّةِ الَّتِي كُنْتُمْ تُوعَدُونَ * نَحْنُ أَوْلِيَاؤُكُمْ فِي الْحَيَاةِ الدُّنْيَا وَفِي الْآَخِرَةِ وَلَكُمْ فِيهَا مَا تَشْتَهِي أَنْفُسُكُمْ وَلَكُمْ فِيهَا مَا تَدَّعُونَ * نُزُلًا مِنْ غَفُورٍ رَحِيمٍ ﴾[فصلت: 30، 32].
مروان: صدق الله العظيم…
مضينا هديك الليلة نحكي عن القرآن الكريم و حديث يجر حديث و كتير استمتعنا… و فعلاً مافي كم يوم اجا ابن عمو لمروان و جابلي هدايا بس ما كان معهن السلسال مع ان مروان وعدني و طلبت منو بلساني!!!
خجلت راجعو بالموضوع بس حطت بنفسي انو شرحتلو شو سبب طلبي و تندمت انو طلبت منو هاد الشي بلساني، بس قلت بسيطة الواحد بتعلم من اغلاطو…
بالليل رنلي مروان بس كنت منرفزة منو قلت يا بنت لا تردي هلا و يفهم من صوتك انك زعلانه و يفكرك انسانه ماديه…
احسن شي اعمل حالي نايمة!!
حطيت الموبايل ع الصامت… و طفيت الضو و نمت…
-2-
صحيت تاني نهار تفاجئت بكمية الاتصالت والرسائل الي واصلتني !! حسيت بالذنب والخوف بنفس الوقت و انو كبرت القصه وما الي حق
يمكن ما معو مصاري يمكن نسي يمكن اي شي ما بحقلي اعمل هيك
اتصلت عليه فوراً ورد علي وكان ملهوف كتيرررررررر
مروان : شو صاير رهف ؟
رهف : مو صاير شي شبك ليش هيك مرعوب انا بس نمت بكير بعتزر
وحاولت كتير اقنعو انو انا بس نمت بكير وهو كان مستعجل لانو كان بالدوام .. ضليت مخنوئة كل النهار وانا عم فكر انو ليش هيك عملت
واجا الليل ورنلي مروان ورديت فورا وكنت ناطرتو .. كان قلبو طيب كتير وحنون
كان بس مشتئلي وخايف علي وموضوع الطوق كلو ناسيه .. حاولت دللو واتغزل فيه لنتجاوز الموضوع ورجعنا لطبيعتنا وما فتحتلو السيره
وهيك مرق هالشهر الطويييييييييييييييل علي لانو صار موعد رجعة حبيبي كان جهاز خالص واخترت احلى فستان ابيض ممكن تلبسو عروس بالكون
كان كل شي متل ما بدي ومتل ما بتحلم اي بنت الحمدلله ... صار العرس بسرعه لان مروان اجازتو كتير قصيرة وهو ماسك عدة مشاريع
ما فيه يتركهن للعمال بدون ادارة ... وانا ما كان عندي اي مشكلة لان كنت رح جن وروح شوف دبي الي بسمع عنها !!
كنت متشوقه متل اي بنت بدها تنتقل ع بلد بضجة وشهرة الإمارات .. وبنفس الوقت عزت علي هالبلد والطلعه منا
كل شي فيه غالي ع البي ، بسب ما لازم ازعل لاني رايحه مع شريك عمري لنبلش حياتنا ...
كان عنا بيت كبير بس لسه مو مأثث لهيك طلعنا من الصالة على الأوتيل مباشرة لنقعد 3 ايام وبعدها نسافر
اول ما تسكر علينا باب البيت بلش البي يدء بسرعه و ارتعبت .. ولا كأني الي من شوي كنت نط و ارقص بالصالة وطاير عئلي من الفرح
مروان : مبروك حبيبتي
رهف : الله يبارك فيك ويخليلي ياك
قرب مني وانا غمضت عيوني ].. وبعدا حسيت انو عم يلبسني شي برقبتي
فتحت عيوني وقلتلو شو عم تعمل؟
مروان: هي هدية عرسك… تأخرو و هن يفصلوها لان كتابة الآية كان بدها دقة ووقت طويل و انا ما حبيت استعجلهن ليشتغلو شغل ما صار منو، وهلا هاد الطوق هو هديتي الك
و كل ما تجيبيلي بيبي رح جبلو ليرة دهب محفور عليها نفس الآية اتفقنا؟
نزلو دموعي من الفرحه… جد هاد الشي كان كتير بيعنيلي
مسكت التعليقه… كان فعلاً متعوب عليه و مشغول بحرفية…
غمرتو و قلتلو الله يقدرني ازرع بقلبك ربع السعاده الي عم تسعدني ياها…
و مرت احلى ايام عمري مع حبيبي برواق و راحة بال… صار موعد السفر و ضبينا اغراضنا و اخدت الي فيني اخدو من جهازي و مروان كان منبهني انو بكمل جهازي من هنيك لهيك بس كان معي الاساسيات…
ودعت الكل و طلعنا بطيارتنا و كنت خايفه لان اول مره بركب طيارة… ضحك علي مروان و قلي والله يا مدام بدك تتعودي…
ضليت مخبيه وشي على كتفو كل الرحلة لان فعلاً كنت مرعوبه
بس كان في لذة بنفس الوقت… الطلعه بالطيارة الها فخامه خاصه هههه
حسيت حالي حدا مهم و هو ماسك ايدي باهتمام…
وصلنا بخير و سلامة… اول شي لاحظتو بس طلعنا من المطار هو الرطوبة و الحرارة! بس كان عندي خلفية عن الموضوع من قبل…
كان رفيق جوزي ناطرنا…
ركبت ورا و كنت مشغوله بانو اتفرج ع البنايات العالية و السيارات الفخمة… و الطرق الانيقه و شجر النخيل الكتير و منتشر بكل مكان
الدوارات الي كل دوار بحكي قصة و حكاية و تنسيق الورد و النظافه الي مل سبق وشفت متلا بحياتي…
رهف: مروان ليش ما في ناس بتمشي بالشوار ع رجليها متل عنا بالشام؟
انحرج من سؤالي قدام رفيقو و قلي هي البلد حكايتها حكاية… فيها الف لغز… رح عرفك عليها شبر شبر ع مهل حبيبتي
رهف: طيب مروان وين برج خليفة و النافورة الراقه الي بيطلعو بالتلفيزون ما رح نشوفن هلا؟
مروان: منشوفهن… بس بعدين…
و لاحظت انو لازم اسكوت هلا لنصير مع بعض بسالو عن الي بدي ياه…
-3-
وصلنا على بيت كبير متل الفيلا… مرتب و انيق و الو حديقه وسور… نزل رفيق مروان اغراضنا وقلو ازا اعتزت شي يا عريس خبرني… و راح
مروان: عجبك البيت؟
رهف: يا الله بطير العئل هاد بيتنا؟؟
مروان: ايه يا اميرتي هي مملكتنا… يلا تعي و فوتي برجلك اليمين…
عرفني عالبيت و كان فخم كتيرررر و انيق كان رح يغط ع البي من الفرحة…
و بعدا… بلشت تمشي ايامنا و مروان اول شهر ما خلى مكان بدي ما اخدني عليه مطاعم مولات اسواق بازارات ابراج حدائق كل شي كان بطير العقل.. كان دايماً يقلي جملة وحدة
[ اللمعة الي بشوفها بعيونك و انتي عم تطلعي حواليكي متل الاطفال بتسوا عندي الدنيا و ما فيها ]
يمكن اي رجال تاني كان لازم يتدايق انو مرتو مجلوئة هيك و هبلة كل هالئد بس الحمدلله جوزي ما كان هيك… و مع الوقت بطل عندي هالانذهال هاد لان صرت اعرف كل شي و افهم شو هي (دبي)...
بعد 3 شهور طلعت حامل و فرحتنا ما كانت بتنوصف… صرنا نخطط ازا بنوته شو منسميا و ازا ولد شو منسميه و كيف رح نربيه و كل هالحكي…كان مروان ناطر ابنو بفارغ الصبر و يخاف علي من نسمة الهوا لدرجة جاب لفاية تخدمني لان خايف ع الولد!
بالبداية كان هاد الشي حلو و اي ست بتتمناه
بس صار الموضوع متل الحبس… يجبلي كتب عن الحمل و الجنين و الامومة و يجبرني اقرأهن لان بخاف ع ابنو…
و الاكل بالبيت صار كلو صحي 100% لدرجة مقرفه
اللحوم نادر تنطبخ السمنه ممنوع المقالي ممنوعه الاكل بنطبخ ع البخار و لازم انتبه ع نظامي الغذائي! و رفع نعرف جنس المولود لان كمان بخاف من العين!
و فوق هيك بلشت اخلاقي تديق من هي البلد الي بالواقع هي عكس ما بتخيلها الواحد..
مملة و روتينيه… حياة بتخنق وين ايام الشام الي بس يديئ خلئي بنزل اتمشى مع خواتي وناكل بزر..
وين لما نضحك بالطرقات من كل قلبنا و نشتري سندويشة فلافل و نقعد بالحديقة ناكل مع كولا… هي الذكريات كلها كانت عندي احلى من افخم قعدة بارقى مطرح… بس ما كنت صارح مروان بهاد الشي…
لوقت ما تأزمت نفسيتي و تعبت كتير و صرت نق عليه انو بدي انزل اجازة لعند اهلي و هو يرفض… صرت حس حالي مسجونة
هي مو حياتي و لا رغبتي و لا بدي عيش هيك…
يمكن الموضوع ابسط من هيك بس اشتقت لاهلي و الحمل كان كتير متعبني بسكل كبير و وحامي صعب..
بطل ع لساني سيرة الا انو بدي انزل لعند اهلي لو اسبوع وهو يرفض و ما يوافق يناقشني… ولما سكرت بوشي… اتصلت بحماتي و قلتلها تقنعو ولا بنزل غصب عنو لان انا نفسيتي ما عاد متحمله و حملي صعب بدي حدا من اهلي جنبي!!
وعدتني تحكي معو و انا نق من جهة و امو من جهة… رجع علي بيوم من الايام و انا كنت عم اكوي بغرفة للنوم
مروان: رورو وينك حبيبي
رهف: هووون بغرفة النوم تعا
فات لعندي و حطلي تذكرة عالتخت و قلي مشان تعرفي انو طلباتك اوامر
رهف: شو هي؟
مروان: حجزتلك ع الشام تنزلي لعند اهلك… خلص استسلمتلك يا مرتي
تركت من ايدي و صرت نط و اضحك متل الصغار و نزلت دمعتي من الفرحة…
مروان: رح تنزلي تولدي هنيك…
هون راحت كل الفرحة و استغربت قلتلو اولد هنيك! انا لسه بشهري الخامس بدك ضل عند اهلي 4 شهور و ابنك يجي و انت بعيد عنو ؟!!!!
-4-
مروان: هيييي هيييي علينا وبعدين معك مافي شي عم يعجبك
رهف: ليش عم تحكي معي هيك! انت شايف منطق اول ولد النا ما تشوفو و ما تكون جنبي بولادتي!!
قرب مني وقعدني عالتخت و قعد جنبي…
مروان: رهف حبيبتي انتي بتعرفي انو انا متلهف لجية ابنا اكتر من اي شي بالكون… بس شغلي ظروفو قاسيه و مشان ابني ما لازم اهمل شغلي… هلا اسمعي شو بدي قلك
انا كنت مأجل نزلتك لتصيري بشهرك بتنزلي بتولدي هنيك… لان هون مافي حدا يدير بالو عليكي
قد ما حاولت انا اعمل كل شي ما رح كون متل امك صح؟
رهف: صح بس كيف انت…
مروان: هس اسكتي ام راس…خليني كمل… بس خلفتي رح اخد اجلزة و انزل لعندك تاني نهار فوراً… بس تفتحي عيونك رح تلاقيني جنبك
رهف: بتوعدني؟
مروان: بوعدك
بالفعل ترتبت امور سفري و نزلت لعند اهلي و فرحت كير بشوفتهن… و بلشت اثث بيتنا الي بدون اثاث و مروان يبعتلي مصاري و يتطمن علي لوقت ما اجا موعد ولادتي…
اول شي قلتو و هن عم يفوتوني ع غرفة الولادة / اتصلو بمروان خلوووه يجييييي /
و بعدها مرت علي اوقات صعبه كتيرررررر و تعزبت بولادتي….
سمعت صوت طفل عم يبكي و عرفت انو صرت ام…
قالتلي الممرضه مبروك اجاكي بنت… ابتسمت و نمت نوووومة بتسوا الدنيا…
تاني نهار فتحت عيوني… و كان مروان جنبي متل ما وعد..
و امي و الكل بالغرفه و مبسوطين
رهف: وين بنتي؟
امي: رح قول للممرضة تجيبا…
قعدت احكي انا و مروان لبين ما يجيبو بنتي…
رجعت امي و وشها ما بيتفسر
امي: صهري بالله تعا معي عايزتك شوي
رهف: شو في امي؟
امي: لا بس بدهن مروان شوي
رهف: مين بدو ياه؟ لك شو في بنتي صايرلها شي؟
امي: ياربي دخيلك… حسبي الله ونعم الوكيل… حسبي الله ونعم الوكيل
مروان: شو في البنت صايرلها شي؟؟؟
امي: البنت… البنت… البنت طلعت معاقة
نزلت هي الكلمة علي متل الصاعقه و انقلب الفرح لدموووع و بكي…. ابشع شي كان هو مروان!! لهلا بتزكر ردت فعلو
مروان: معاقه!! … انا ما عندي ولاد معاقين… ازا معاقه ما بدنا ياها
امي: كيف يعني ما بدك ياها اخزي الشيطان لك ابني
مروان: ما بدنا ياهت يعني ما بدنا ياها… و ما رح نستلمها
رهف: انت شو عم تخبص هي بنتي كيف يعني ما رح نستلمها حنيت مروان؟؟؟
طلع وقتا من عندي و ما عاد شفت وشو لتلات ايام… عرفت باخر يوم انو رجع ع دبي
بدون ما يشوف بنتو…
-5-
بنتي ما كانت معاقه… بنتي كانت معها متلازمة داون
المتعارف عليها بالمجتمع بالمنغولية…
ضحكتها كانت متل الشمس… ملائكية
روح بريئة… حرمني مروان اتهنى فيها
من الزعل انقطع حليبي و ما قدرت رضع بنتي، بس كنت شايفتا وماني مسدئة… و مروان اختفى كأنو فص ملح و داب
اجت امو و باركتلي و لبست البنت حلق
قلتلها مروان وعدني يلبسها ليرة عليها اية قرآن…
قالتلي رح زكرو…
قلتلها و البنت ايمت بدو يسجلها!!!
قالتلي امانه لا تواخذيني مو عارفه اتفاهم معو طولي بالك علي!!
قلتلها كنا متفقين ازا اجتنا بنت نسميا ملاك… سجلوها ملاك..
حطيت بقلبي و سكتت،، بعد يومين اجا عمي (حماي) وقلي انو مروان وكلو يسمي البنت
رهف: سجلتوها ملاك؟
عمي: لا والله مروان ما رضي و قلي سميها مايا
رهف: مايا!! ليش هالاسم حصرا
حاول يتهرب مني كتير بس ما تركتو لافهم ليش ما سماها معناهحلفني مية يمين سميها هيك
عمي: قال ملاك رح يكون اسم بنتو السليمة مو بنتو المعاقه… و سماها مايا لان معناه انثى القرد… نزل راسو عالارض و قلي اسف ما طلع بايدي شي
و تركني وانا رح جن… و راح
كيف بني ادم بيعمل هيك ببنتو؟ ما حن قلبو يشوفا؟
ليش هيييك عم يعمل…. لييييش هيك ياربي دخيلك ليييش
حملت بنتي بين ايدي… سبحان الي خلقها الضحكة ما كانت تفارق وشها… و قلتلها يا حبيبتي يا امي لو سموكي شو ما كان رح تضلك ملاكي… وما رح خلي حدا يئزيكي تئبريني
بعد شهررررر كااااامل رنلي جوزي…
رفضت احكي معو بشكل قطعي… صار يتصل ع اهلي و يوسط اهلو لرد عليه و قال في شي ضروري و ما رضي يحكيه لحدا…
بعد اخد و عطا و جدال… اقنعوني احكي معو و انو اكيد عرف غلطو و حن ليشوف بنتو…. و بصراحه انا كنت كتيرررر مشتائتلو
وما حبيت بنتي تربى بدون اب لان رح تكون بحاجة سند تستند عليه….
هيك كل عمرها الانثى بتنجرح و بتسامح بدون مقابل
مسكت الموبايل و رنيتلو… وفورا رد
مروان: رهف… اشتئتلك كتيررررر…. بيتك مطفي بدونك و انا ما عم اقدر عيش بلاكي
ريحتك بكل مكان…. انا كتير اشتئتلك
رهف: هلا جايه تحكي هالحكي؟
و تزكرت انو بدي انهي الخلاف و ما كبرو…. فوراً تراجعت و قلتلو و انا كتير اشتقتلك…
سكت خمس دئايئ.. صوت نفسي و صوت نفسو بيحكو الف حكايه
بيحكو عتاب و وجع و زعل و قهر…. صوتو نساني كل عمايلو…
و قلت كل البشر بيغلطوووو و هو عرف غلطووو….
مروان: ما بدك ترجعي لعندي؟
رهف: امبلى، و باسرع وقت لان تعبت كتير… احجزلي باقرب موعد
مروان: دخيل الي خلئك ايه؟ ازا ما لقيتلك طيارة رح اجي اخدك ع ضهري
رهف: اوف هالئد مشتئلي؟؟
مروان: بس تجي رح تشوفي اديه مشتئلك… انتي خليكي جاهزة ايه؟؟
رهف: مروان ليك… البنت بدها تذكرة و لا ما بيحسبولها؟
و فجأة اختفى صوتو
حتى نفسو اختفى
رهف: الووو وين رحت شو فصل الخط؟
مروان: بس مو هيك كان الحكي… انا قلتلك قبل ما اطلع انو انا ما عندي بنت معاقه
رهف: شو يعني ما فهمت؟!!
مروان: يعني البنت بتتركيها عند بيت اهلك يربوها و مصروفها بيوصلها كل اول شهر…و مننسى كل هالالم الي عشناه و منجيب ولاد طبيعين!!!
رهف: بدك اجي و اتركها؟
مروان: بتتركي البنت… و بتضبي اغراضك… اوعي تفكري تجيبيلي هالقردة معك!!
-6-
سكرت الخط بوشو وقفلت موبايلي وقمت متل المجنونة كسرت كل شي حوالي…. صحيو اهلي و فاقت بنتي و صارت تبكي
بس سمعتا عم تبكي كأن في شي جواتي انكسر
ركضت عليها بوستا و غمرتا و صرت غنيلها و اهلي واقفين فوق راسي و مرعوبين علي…
حطتني امي بتختي و نيمت بنتي جنبي و مضت هديك الليلة عن الف ليلة…
تاني نهار كنت كتير تعبانه صحيت ع ضحكة بنوتي قمت حاولت رضعها كمان ما مشي الحال… عملتلها حليب و قعدت العب معا و ارتاح بالي شوي و هديت…
بعدين قمت عالصالة و اتصلت ببيت عمي و رد حماي
رهف: مرحبا عمو كيفك… كيف صحتك… عمي لو سمحت انا اعتبرني متل بنتك… انا بنت عالم وناس جيتو و جبتو جاهة و طلعتوني من بيت اهلي معززة مكرمة و هلا انا رجعتلهن كمان معززة مكرمة… بقى ورقة طلاقي بتوصلني وما بدي منكن اي شي من حقوقي و لا بحملكن اي مسؤولية تجاه بنتي…
حاول يناقشني كتير و بعدين اخدت مرت عمي الهاتف و قلتلها غير الحكي الي قلتو ما عندي… بعتزر منكن… وازا ما رح يطلقني بالمعروف انا رح ارفع عليه قضيه…
انا هون سكرت الهاتف و اهلي كلهن عم يبحلقو فيني
امي: ولك بدك تطلئي؟؟؟
بدك تفضحينااااا… شو بدنا نقول للعالم… يا فضيحتنا بين الجيرااااان…. ياااارب
ابي: ابي رهف… حبيبتي لا تسمعي حكي امك… انا بعرف شو ربيت… و بثق بقراراتك
و بنتك بحطها ع راسي من فوق يا قلبي…. ولا شوفك متل حالة امبارح فهمانه يابي؟
ركضت لحضنو و بكيت لارتاح البي.. حرام لو بنتي عندا اب متل ابي!!!
اهل مروان بعتولو خبر بالحكي و انو هددت ارفع قضية طلاق وهو ما سدئهن لوقت ما اتصل ع ابي وقلو ابي ما عاد الك زوجه عنا… و مسامحينك بحقوقها… جن و عيط ع ابي و قلو طلاق ما رح طلق و مرتي رح انزل و اخدها من عندكن
حكيو ما شلتو من ارضو لان هالبني ادم طلع من قلبي و نزل من عيني بشكل نهائي و ما عاد يعنيلي شي…
قررت بلش حياة جديدة… بس رب العالمين كان كاتبلي مخطط غير الي كان ببالي اطلاقا…
بهديك الليلة ملاكي ضلت تبكيييي و ما كانت تسكوت… و ما كنت اعرف شبها… حاولنا ننطر ليطلع الضو بس البنت كانت رح تموت من البكي
صحيت امي و ابي وقلتلهن بدي اخد بنتي ع المشفى بس قالولي انتي بتبالغي و بتخافي عليها كتير شربيها يانسون بتكون ممغوصه…
عملتلها يانسون و ما سكتت و رفضت تشرب و رفضت تاكل وضلت هيك عم تبكي لوش الفجر… قبل ما يقول الله اكبر
بنتي سكتت فرد سكته…. كنت تاركتا ع التخت و عم اتوضى…
كنت رايحه احملها وشوف ليه سكتت بس سمعت ( حي على الصلاة حي على الفلاح) … ابتسمت و قلت دخيل اسمو الله سكتت ع صوت الادان… لبست تياب الصلاة و صليت…
و قرأت قرآن و رحت لحطها بتختها…
بس حملتا كانت ايديها باردة كتر… و وشها ازرق…
نزلتا من ايدي و فكيت عنها تيابها…. لاطمن شبها
يتبع .........
إرسال تعليق