حدوتة النهاردة اسمها .... ( مالك الغضبان )
كتابة و تأليف : شيماء عبدالعال
كان ياماكان ...كان في زمان ...☺☺.ولد اسمه مالك ....و كان مالك له اخ صغير اسمه معاذ ......و في يوم من الايام ....طلب مالك من باباه ان يجيبلوا مكعبات .....لانه نفسه فيها علشان يعمل بيها اشكال و العاب كتير ........
باباه وافق ووعده انه هيجيبهالوا ....☺☺.وفي يوم رجع بابهم من الشغل و كان جايب له معاه مفاجأة ....علبة كبيرة اوووي مليانة مكعبات كتيرة .......فرح بيها مالك جدا و فضل يلعب بيها و يكون بيها اشكال كتير ....
و تاني يوم قعد مالك يرصص المكعبات و يركبها في بعضها لحد ما عمل بيها شكل قصر كبير و جميل اوووي ..... فرح مالك جدا و اخد القصر علشان يورية لباباه و مامته ......
باباه و مامته عجبهم القصر جدا و كمان عجب اخوه معاذ .....طلب معاذ من مالك انه يمسكه و يتفرج عليه حبة ......لكن مالك رفض و قاله لا مش هينفع دة حجمه كبير ....و انت صغير .....مش هتعرف تمسكه وممكن يقع منك .....
زعل معاذ و قاله متخافش انا هخلي بالي .....بصلوا باباه و قاله خليه يمسكه و يلعب بيه شوية يا مالك و يرجعهولك ...... رد مالك و قاله : حاضر يا بابا هديهوله .....
مد مالك ايده لمعاذ بالقصر اللي عمله من المكعبات عشان يمسكه ..... و اول ما مالك سابه .....وقع القصر من ايد معاذ علي الارض و اتكسر.......المكعبات فعلا كانت تقيلة علي ايد معاذ و مقدرش يمسكه كويس .
غضب مالك جدا من اخوه معاذ و قعد يزعق له ....... و كمان صوته بقي عالي و قال لباباه .....شوفت يا بابا ....مش انت اللي قولتلي اديهولوا .....اهو كسره .....و انا تعبت فيه جدا عقبال ما عملته بالشكل دة .......كل دة علشان بتحبوه اكتر مني .......و اي حاجه بيطلبها بتنفذوهالوا و خلاص ......و انهار مالك في العياط ...........
راحلوا باباه و طبطب عليه و قاله : اهدي بس يا مالك .........مفيش اب او ام بيحبوا حد من اولادهم اكتر من التاني .....احنا بنحبكم انتوا الاتنين .....اما القصر بتاعك دة فوقع منه غصب عنه .......انا مكنتش اعرف انه تقيل كدة .....معاذ غلط فعلا .....لانه وعدك انه هيخلي باله منه .
بس اللي حصل ميستحقش انك تزعق في اخوك كدة ....او انك تعلي صوتك عليا كمان .....و لا ايه ؟.......انت فعلا تعبت فيها علشان تعملها ......بس دي لعبة و ممكن تعمل احلي و اجمل منها تاني عادي ........ و دة اخوك الصغير .....يعني لما يغلط فهمه غلطه براحة و لازم تكون حنين عليه ..
حط مالك وشه في الارض و قاله عندك حق يا بابا ....انا اسف .......قرب منه معاذ و قاله ....انا كمان اسف اني كسرتلك القصر اللي عملته بالمكعبات و تعبت فيه .......
اتكسف مالك من نفسه جدا ....و قال لمعاذ .....متزعلش مني .....و سامحني لاني زعقت لك ...... و يلا بقي تعالي ساعدني نلم المكعبات و نعمل بيها قصر اكبر و احلي من اللي اتكسر كمان .......
و توتة توتة خلصت الحدوتة .....حلوة و لا ملتوتة
خلوا اولادكم يجاوبوا علي الاسئلة دي :
1_طلب مالك من باباه ان يجيبلوا لعبة .( قطار _مكعبات _طائرة )
2_استخدم مالك المكعبات و عمل بيها.( برج كبير - هرم كبير _.قصر كبير )
3_لما معاذ مسك القصر بتاع مالك ( اخده حطه علي الترابيزة - وقع منه علي الارض اتكسر _ رفعه بايديه الاتنين لفوق )
4-لما القصر بتاع مالك اتكسر ( غضب جدا و زعق لمعاذ _ سكت و مقالش حاجه _ ضرب اخوه )
5_لما بابا مالك فهمه ان غلط.. مالك عمل ايه ( فضل يعيط _ اعترف بغلطه و اعتذر لاخوه - جري علي اوضته و متكلمش )
1_طلب مالك من باباه ان يجيبلوا لعبة .( قطار _مكعبات _طائرة )
2_استخدم مالك المكعبات و عمل بيها.( برج كبير - هرم كبير _.قصر كبير )
3_لما معاذ مسك القصر بتاع مالك ( اخده حطه علي الترابيزة - وقع منه علي الارض اتكسر _ رفعه بايديه الاتنين لفوق )
4-لما القصر بتاع مالك اتكسر ( غضب جدا و زعق لمعاذ _ سكت و مقالش حاجه _ ضرب اخوه )
5_لما بابا مالك فهمه ان غلط.. مالك عمل ايه ( فضل يعيط _ اعترف بغلطه و اعتذر لاخوه - جري علي اوضته و متكلمش )
لو عجبتكم علقوا ب تم ليصلكم كل جديد ☺
Post a Comment