مروان و أداب الاستئذان

مساء الخير عليكم كلكم .....حدوتة النهاردة الهدف منها توعية الاطفال بأداب الاستئذان ......لان دلوقتي في اطفال كتير متعرفهاش .....

حدوتة النهاردة ..( مروان و أداب الاستئذان )

كان ياما كان  .....كان في زمان ولد اسمه مروان ......  كان مروان ولد جميل و مؤدب ......كان بيحب اوي يلعب مع أحمد زميله في المدرسة و كمان جارهم في العمارة .......كان مروان بيستأذن مامته انه ينزل يلعب معاه و ساعات كان احمد هو اللي بيطلعلوا ........

و في يوم من الايام نزل مروان لاحمد عشان يلعب معاه و رن الجرس لكن احمد مفتحش الباب .....رن الجرس مرة كمان برضه مفتحش ........قعد يخبط علي الباب جامد برضه محدش فتحلوا .....

...طلع تاني بيته و هو زعلان جدا ........و لما مامته سألته مالك يا مروان ......???? قالها مفيش يا ماما اصل رنيت الجرس كتير علي احمد و خبط علي الباب جامد اوووي لكن محدش فتحلي ........

.قالتلوا متزعلش يا حبيبي .....ممكن يكونوا نايمين او مش موجودين .......او ممكن يكون  عندهم ظروف و مش هينفع يفتحولك ......انت متعرفش ظروفهم ايه....

.و انا من رايي بعد كدة قبل ماتنزل عند أحمد تكلمه في تليفون البيت و تخليه يسأل مامته الاول و يستئذنها  اذا كان ينفع تنزل تلعب معاه و لا لا ????... .......بص مروان لمامته و هو زعلان برضه و قالها حاضر يا ماما.....اللي حضرتك تشوفيه ...... 

  راح مروان تاني يوم المدرسة و هو  عمال يفكر ياتري احمد مفتحش ليه يا تري كان نايم و لا خرج او يكون جوة و سمعني و انا بخبط بس مفتحش عشان مش عايز يلعب معايا ..........????? ...و كان مستني يشوف احمد عشان يسأله ......و لما بدأت حصة الدين .....دخلت ميس هاجر  الفصل و بعد ما سلمت علي الاولاد ......

.قالتلهم النهاردة يا اولاد هنتكلم عن اداب الاستئذان .......كل الاولاد انتبهوا لكلام ميس هاجر .......كملت  كلامها و قالت لهم ....بصوا يا أولاد .....الدين بتاعنا حاطت لنا شوية اداب للاستئذان  لو التزامنا بيها ....

..اكيد هتبقي حياتنا احلي .و هنبقي مبسوطين اكتر ...اولا لما نروح نزور اي  حد  نخبط علي الباب بالراحه مش بعنف .......✊✊✊و نخبط تلات مرات بس ......لو اللي جوة البيت فتحوا و سمحولي ادخل ....يبقي تمام ....

.سأل مروان ميس هاجر .......طيب و لو مفتحوش اعمل ايه ........???ردت و قالتلوا لو مفتحوش  يبقي ارجع و انا فرحان مش غضبان و زعلان.......لان انا معرفش ظروفهم ايه .....ممكن يكونوا نايمين او خرجوا و مش موجودين .......و لو اللي جوة البيت سألني انت مين ?????مقولش انا و اسكت لا ..... 

  لازم اقول اسمي يعني مثلا ....   اقول انا هاجر .......و اول ما يفتحوا الباب لازم اسلم علي اللي فتح الباب و اقول السلام عليكم ..... و استأذن قبل ما ادخل ....سألت يارا ميس هاجر ... طيب لو انا جوة الشقه و حد قافل علي نفسه باب الاوضه لازم اخبط و استأذن برضه و لا افتح الباب علي طول .......

ردت ميس هاجر لاطبعا يا يارا ...... لازم اخبط و استأذن لان ممكن يكون في حد بيغير هدومه مثلا .......... يعني لازم استأذن قبل ما ادخل علي بابا و ماما اوضتهم لو الباب مقفول  ......يعني اخبط علي الباب بالراحه و اسألهم ممكن ادخل ??????....

..لكن يا اولاد في اماكن ممكن ادخلها من غير ما استأذن ......و هي الاماكن اللي مفيهاش ناس عايشين و ساكنين فيها .......سأل حسام ........بجد يا ميس هاجر زي ايه الاماكن دي ........???ردت ميس هاجر  زي المسجد مثلا مش لازم استأذن او اخبط علي الباب قبل ما ادخل ......

..او المحلات لما اجي اشتري حاجه مثلا بدخل من غير ما استأذن........كان مروان  بيسمع كلام ميس هاجر باهتمام و تركيز ........و لما قابل أحمد صاحبه ...مسألهوش مفتحش ليه امبارح .....بالعكس كان مكسوف جدا من نفسه لانه مكنش ملتزم بأداب الاستئذان لما زاره .......

و اتضايق من نفسه اكتر كمان لما احمد قاله ان جدته كانت تعبانه جدا امبارح و انهم راحوا عشان يزوروها و يطمنوا عليها .........ساعتها اتاكد ان  مامته كان عندها حق  لما قالتلوا .....انت متعرفش ظروفهم ايه.....

..و قرر مروان  من ساعتها انو يلتزم باداب الاستئذان اللي شرحتها لهم ميس هاجر النهاردة .لانه استفاد منها جدا ....و عرف حاجات جديدة .......و توته توته خلصت الحدوتة حلوة و لا ملتوته

لو عجبتكم القصة دوسوا لايك و شير علشان توصلكم حودايتنا باستمرار  

و خلوا اولادكم يجاوبوا علي الاسئلة دي
1-مروان و احمد كانوا ( اصحاب في المدرسة بس - زمايل في المدرسة و جيران - اصحاب في النادي )
2-مروان كان زعلان من احمد علشان ( خبط علي بيته و مفتحلوش -مرضيش يروح معاه المدرسة - مرضيش يروح معاه النادي)
3-ميس هاجر اتكلمت في حصة الدين عن ( اداب الركوب - اداب الطعام -اداب الاستئذان)
4-لو خبطت علي حد تلات مرات و مفتحش اعمل ايه ( اخبط تاني - اسكت و ارجع و انا مش زعلان -اغضب و اتضايق )
5-لو خبطت علي حد و سألني مين ( ارد و اقول اسمي -مردش و افضل اخبط تاني - اقول انا و اسكت )
6-ايه هي الاماكن اللي ممكن ادخلها من غير ما استئذن ؟

تأليف و كتابة : شيماء عبدالعال