قصة قبل النوم .. :)
منقول ...
من حوالي سنتين وانا في السعودية وأيام السيول .. لقيت مرات أخويا (وهي ساكنة في الدور اللي تحتي) بتتصل بيا
وتقولي:
إلحقيني يا آية .. النهاردة وانا بنضف البلكونة لقيت حمامتين أم وأب ميتين .. وسايبين عش فيه فرخين صغيرين جدا وهيموتوا 😢
المهم روحتلها وحاولنا نلاقي حل او نعرف نأكلهم.. لكنهم بيبي أوي وعيونهم مقفلة ولازم الاكل يدخل جوه منقارهم ودي عملية صعبة جدااااا بالنسبة لحجمهم
روحت يومها وانا حزينة و مهمومة .. وبقول سبحانه خلق كل شئ بقدر .. بس ايه الحكمة يارب في خلقك الفرخين دول وموتهم الأكيد من الجوع
ليلتها نمت وشفت رؤيا عجيبة .. اني بحلم جوه الحلم ..اني لقيت في بلكونتي انا عش تاني فيه أفراخ حمام .. وبقول لصفاء نحط دول مع دول والأم هتتبناهم .. وصحيت من نومي وانا لسة في الحلم واني اتصلت بيها وبقولها ندور في بلكونات كل اصحابنا على عش تاني.. حاجة كده لخبطة
المهم قمت من سريري جري على بلكونتي اللي مدخلتهاش من شهور بحكم حياة السعودية المغلقة.. وببص ورا كرتونة قديمة .. لقيت عش فيه فرخين قدهم تقريبا مع مامتهم وباباهم.. وانا معرفش بوجوده
وبالفعل نقلنا الكتاكيت اليتامى في العش الجديد والام والأب بره من غير مايشوفونا.. وحطنالهم أكل .. يومها سمعت منهم كمية حوارات وصوصوة عالية ومناقشة حادة جدا .. تقريبا كان بيحلفلها انهم مش عياله من مراته التانية وان مالهوش ذنب 😂
وفعلا الام والأب اتبنوا الكتاكيت الأربعة وبقوا يحبوهم ويأكلوهم كل يوم بالتساوي.. وبراقبهم .. وكبروا وعرفوني لدرجة انهم بقوا بينقرولي على الإزاز لو اتأخرت عليهم في الأكل ..
الخلاصة .. ان ربنا علمني دروس عمري ماهنساها..
* اوعى تشك لحظة في حكمته وقد خلق كل شئ بقدر ✋
* مالك الملك لما بيريد شئ مش محتاج يقلب الكون وهو القادر.. لكنه اكتفى وهو العظيم على عرشه فوق سبع سموات بإرسال رؤيا تسللت لمنام إنسانة ضعيفة قليلة الحيلة لينقذ بيها فرخين بحجم عقلة الإصبع .. في بلكونة وسط ملايين العمارات وسط كوكب يعج بمليارات البشر المتحاربة على لقمة العيش .. لينقذهم ❤❤
من بعدها وانا بقيت اتكسف اخاف على رزق ولا مشكلة والله هو مدبر هذا الكون.. ازاي تخيلت للحظة انه ممكن ينساهم ❤
اعملوا وتوكلوا على الله واحسنوا الظن به.. واطمنوا عمره مانسيكم ولا هينساكم😊
((وما من دابة في الأرض إلا على الله رزقها ويعلم مستقرها ومستودعها كل في كتاب مبين)).. صدق الله العظيم ❤
#
Post a Comment