دمتم متحابين

ماتخافش :
زوجه: عندي عقده من قبل الجواز. ماما كانت بتخاف بابا يتجوز عليها و بيتنا كان غير مستقر. و اتربينا وسط خلافاتهم انا و اخواتي. بابا ما اتجوزش على ماما . لكن انا اتأثرت بحياتي في بيت ابويا فطلعت مرعوبه من فكرة الزواج التاني . جوزي محترم لكنه مش بيطمني و يحتويني و ده بيخليني في حالة خوف طول الوقت و الخوف منغص علي حياتي. نفسي اسمع منه كلمة" انا بحبك انتي و مش ممكن احب حد غيرك" نفسي يقولي " شيلي اللي في دماغك انا حياتي لك انتي وبس". هو زيه زي كل الرجاله مالوش في الكلام الحلو . اعمل ايه عشان اعرف اعيش في سلام و خصوصا اني دايما حاسه اني محتاجه منه حب و اهتمام و انه مش بيعرف يديهم لي و يحتويني و يشبعني .
التعليق:
طبعا الحب و الاهتمام و الاشباع حاجه اساسيه جدا بدون وجود مشاكل فما بالك لو ان فيه طرف عنده صراع زي الخوف من هجر الحبيب. و طبعا - ايضا - ان الاطمئنان و تقديم الحب و الاهتمام هو دور الزوج ( او شريك الحياه عموما ) بدون جدال. بكلام الحب و افعال الحب و لمسات الحب يتغلب الخائف على خوفه.
لكن يبقى ان الخوف عدو شرس . و يجب ان يسيطر عليه الخائف نفسه  قبل ان يطيح هذا الخوف بعلاقته بنفسه و بعلاقته بالآخرين. لهذه الزوجه اقول . خلي بالك لان " الشك يولد الخيانه" اخشى ما اخشاه ان يفهم زوجك خوفك على انه رساله تقول له " انت مش بتحبني و انا مش باثق فيك". لو حصل انه يقى عنده يقين بهذه الرساله المؤسفه فالعواقب حتما ستكون وخيمه.
سيطري على افكارك . قولي لنفسك" انا بحبه و هو بيحبني و الامان الوحيد - بعد الاستعانه بالله- انه الحب بيينا يكبر و يكون مصدر سعاده له و لي فالشبعان لا ينظر الى الطعام الفائض مهما كان لذيذا". اعملي على تنشيط هذه الفكره داخل عقلك كلما شعرت بالخوف. لو سيطرت على نفسك ستملكين السيطره على حياتك كلها و اولها علاقتك الزوجيه.
الخلاصه:
سيطرة الانسان على  عقله بالافكار الايجابيه تؤدي به الى حياه سويه و ناجحه و اما استسلامه للافكار السلبيه المختزنه من تجارب و ظروف سابقه تقلب الحياه السويه الناجحه الى جحيم مستعر.
دمتم متحابين.