العجوز اللئيم

كان فى راجل عجوز فقير كل يوم بيفوت على البنك يشحت من العملا بتوع البنك .. لدرجة إن مدير البنك والموظفين عرفوه و حفظوه .
و فى يوم من الأيام دخل العجوز لموظف البنك و فى ايده شنطة .. الموظف قال له يحنن يا حاج .. لكن الراجل فاجأه و قاله انت فاكرنى جاى أشحت منك ؟؟ سأله الموظف .. امال إيه ؟؟
قال له أنا عايز افتح حساب و احط فيه المبلغ ده و اداله الشنطة و فيها 5000 جنيه .. قام الموظف بص له بصة خبيثة و قال فى عقله باله كل دى فلوس من الشحاتة ؟؟ .. واخذ المبلغ و عمل له الحساب و كله تمام .

تانى يوم جه الراجل العجوز و حط مبلغ 5000 جنيه تانى فى الحساب و الموظف قعد يقر عليه و يقول هى الشحاتة تعمل كدة ؟
تالت يوم الراجل العجوز جه البنك و برده زود فى حسابه 5000 جنيه و الموظف يستغرب و استمر الحال على كدة شهر كل يوم الراجل العجوز يروح البنك و يحط مبلغ 5000 جنيه.


و غاب الراجل العجوز عن البنك 3 أيام و رجع تانى وهيئته متغيرة خالص من راجل فقير لراجل من ذوى الأملاك نظافة و لبس و شياكة ولا رجال الأعمال .
وكالعادة بردو حط فى حسابه 5000 جنيه و استمر الحال على كدة شهرين كمان .. لكن موظف البنك بقى فى حالة زهول معقول كل ده من الشحاتة .. طبعا مش ممكن الراجل بطل يشحت عند البنك و كمان هيئته مبقتش تنفع للشحاتة .. المهم دخل لمدير البنك وقاله على الراجل العجوز و حكاية ال5000 جنيه ..
ضحك المدير و قاله يمكن لقى كنز أو ورث وفاكر إنه ما ينفعش يحط غير 5000 جنيه فى البنك زى السحب من الماكينة؟؟ على العموم لما يجيلك خليه يعدى عليا .!!
و تانى يوم جه الراجل العجوز كالمعتاد و حط 5000 جنيه فى الحساب قام الموظف قاله المدير كان عايزك تعدى عليه .. 
رد الرجل فى هدوء من عينية .. وراح دخل للمدير و سلم عليه قام سأله المدير .. إيه بقى يا حاج حكاية ال 5000 جنيه بتاعة كل يوم دى؟؟؟ لو عندك مبلغ كبير تقدر تحطه مرة واحدة فى البنك .!!
ضحك الراجل العجوز و قال له: لا طبعا دى فلوس بكسبها كل يوم .. 
رد المدير و قاله طب لو عندك شركة أو محلات ممكن نعمل لك حساب بإسمها ونعملك تحويلات تلقائية .. وو .. الراجل العجوز قاطعه و قال له ولا شركات و لا محلات ريح نفسك .. 
استغرب المدير جدا و سأله أمال بتكسب الفلوس دى كلها منين كل يوم ؟؟؟ 
رد العجوز : أنا براهن كل يوم و بكسب الرهان 
سأله المدير: إزاى يا حاج تكسب رهان كل يوم؟؟!!
              معقول كل الناس اللى بتراهنهم مغفلين ؟؟!!!!
قال له العجوز بلؤم : طب تراهنى انت على 5000 جنيه انى أبوس عينى ؟
طبعا المدير ضحك و قال مستحيل انه حد يقدر يبوس عينيه عشان كدة وافق 
وقال له: أراهنك يا حاج..
و هنا طلع الراجل العجوز عدسة من عينيه باسها و رجعها تانى مكانها
المدير اتشال و اتحط و فهم الخدعة لكنه لأنه راجل بيحافظ على كلمته دفع للراجل العجوز ال5000 جنيه الرهان .
مشى الراجل العجوز و المدير فى حيرة و عمال يفكر ازاى الراجل اللئيم ده يضحك عليه و ياخد منه الفلوس بالبساطة دى .. و فكر شوية وقال لنفسه أحسن طريقة أرجعهم منه تانى بنفس الطريقة و خرج ينادى للراجل العجوز وقال له :
إنت يا عم الحاج هتمشى كدة من غير ما أعوض فلوسى؟؟
رجع له الراجل العجوز و بص له بلؤم و قال له عايز تراهن تانى ؟؟
رد المدير بسرعة طبعا .. قال الراجل العجوز طب تراهنى تانى إنى أعض ودنى ؟؟
بص المدير لودان العجوز بصة خبرة متفحصة يمكن مركب ودان والا حاجة ولما لقاها طبيعية مفيش تركيب ولا حاجة .. إطمن و قاله بثقة أراهنك ..
قام الراجل العجوز فك طقم أسنانه و عض ودنه بيه و هو بيبتسم بهدوء و سخرية ورجعه مكانه جوة بقه و سأل المدير أكسب المرة دى كمان ؟؟
رد المدير و هو مذهول : تكسب و اداله 5000 جنيه تانى ..
راح العجوز اللئيم حط فلوسه فى الحساب و مشى و المدير يضرب أخماس فى أسداس .. إزاى ؟؟ هاتجنن !!! يضحك على كدة و اسيبه ؟!!!! لازم أشوف طريقة أرجع بيها فلوسى و قعد المدير يفكر كتير و بعدين معرفش يعمل إيه .. راح للموظف وقال له لما يجيلك الراجل العجوز بكرة خليه يعدى عليا.
و فعلا جه الراجل العجوز كالمعتاد و معاه مبلغ 5000 جنيه يحطهم فى الحساب أول ما شافه الموظف قال له إنت عملت إيه المدير كان هيتجنن امبارح و عايزك تعدى عليه ضرورى ... رد عليه العجوز فى خبث ولؤم من عينيا.. و راح يقابل المدير لكنه غاب شوية كدة قد تلت ساعة قبل ما يدخل للمدير ..
أول ما شافه المدير من غير لا سلام و لا كلام قاله : تعالى هنا يا راجل إنت .. انت إزاى تاخد فلوسى كدة و تضحك عليا ؟؟!! لازم ترجعلى فلوسى ..
بص له العجوز اللئيم بخبث و قاله خلاص رجعهم زى ما اخدتهم منك ...
سأله المدير : ايه تراهنى تانى ؟؟؟ !!! لا ياعم الحاج .. إلعب غيرها ....
قال له العجوز : طب شوف يا سيدى انا هاراهنك المرة دى لو كسبت انت اديلك فلوسك وعليهم 5000 جنيه من عندى و لو كسبت أنا مش عايز منك حاجة .. ماشى؟
فكر المدير بعمق و لقى العرض مغرى خصوصا إنه مش هيخسر حاجة المرة دى .. قام قاله ماشى أراهنك ... بس على ايه .. لازم المرة دى تكون حاجة تبعى أنا؟
قال له العجوز اللئيم : أراهنك إنك لابس بوكسر داخلى لونه أزرق ..
فرح المدير وضحك كتير جداً و قاله : هاهاهاهاهاها تخسر المرة دى البوكسر بتاعى لونه أبيض .. رد عليه العجوز و قاله اثبت لى لازم اشوف بعينى .. إقلع وورينى ؟؟
بسرعة جدا و بفرحة الانتصار قلع المدير عشان يوريله و يثبت له و قال له : ها صدقت بقى انه لونه أبيض؟؟؟ 
و فجأة دخل موظفين البنك و هم بيضحكوا ومستغربين جدا و ضحك العجوز اللئيم وقاله تكسب بس انا أصلا كنت مراهن كل الموظفين دول على 50 ألف جنيه إنى أقلعك هدومك .